თბილისი (GBC) – უკრაინა, თურქეთი, გაერო და რუსეთი სტამბოლში 13 ივლისს გამართულ შეხვედრაზე უკრაინული ხორბლის ექსპორტის აღდგენის საკოორდინაციო ცენტრის შექმნაზე შეთანხმდნენ. თურქული მედიის ცნობით, ამის შესახებ თურქეთის თავდაცვის მინისტრმა ჰულუსი აკარმა განაცხადა.

„უკრაინული ხორბლის ექსპორტის აღდგენის საკითხზე ოთხმხრივ შეხვედრაზე გადაწყდა საკოორდინაციო ცენტრის შექმნა, რომელიც სტამბოლში იფუნქციონირებს და აქვე იქნებიან მხარეების წარმომადგენლებიც“, – განაცხადა მინისტრმა.

მისივე თქმით, მოლაპარაკებაზე ტექნიკური საკითხებიც შეათანხმეს. კერძოდ, მხარეებმა პორტებთან ტანკერების უსაფრთხოების საკითხები განიხილეს უკრაინის პორტებში და მარშრუტებზე.

„შემდეგ კვირაში უკრაინისა და რუსეთის დელეგაციები კვლავ შეიკრიბებიან თურქეთში და ყველა დეტალს განიხილავენ, ხოლო ჩვენ მიერ გაწეული სამუშაო დოკუმენტურად გამყარდება“, – აღნიშნა აკარმა.

უკრაინის პრეზიდენტმა ვოლოდიმირ ზელენსკიმ კი განაცხადა, რომ „ხორბლის დერეფნის“ ყველა დეტალს უახლოეს დღეებში გაეროსთან შეათანხმებს.

„უკრაინის დელეგაციამ მომახსენა, რომ გარკვეული პროგრესი არის. უახლოეს დღეებში დეტალებს გაეროს გენერალურ მდივანთან შევათანხმებთ“, – განაცხადა პრეზიდენტმა.

უკრაინის, თურქეთის, გაეროსა და რუსეთის დელეგაციების მოლაპარაკება უკრაინული ხორბლის ზღვით ტრანსპორტირების უზრუნველყოფის საკითხზე, რომელიც უკრაინაში რუსეთის შეიარაღებული შეჭრის შედეგად დაიბლოკა, მოლაპარაკება სტამბოლში რამდენიმე საათს გრძელდებოდა.