თბილისი (GBC)  ოზურგეთის მუნიციპალიტეტის მიერ გამოცხადებული ტენდერი, რომელიც ოზურგეთში, ექადის ტყე-პარკის სარეაბილიტაციო სამუშაოებს მოიცავს, ბათუმში 3 თვის წინ დარეგისტრირებულმა კომპანიამ უკონკურენტოდ მოიგო – „შპს მანგისტაუ ინფრასტრუქტურა სტროი - 1-ს ფილიალი საქართველოში’’.

1 100 000 ლარად შეფასებულ სამუშაოებს უცხოური კომპანიის ფილიალი, 993 400 ლარად შეასრულებს.

სახელმწიფო შესყიდვების სააგენტოს ინფორმაციით, ტენდერის პირობებით გათვალისწინებული სამუშაოები  ხელშეკრულების დადებიდან 4 თვეში უნდა დასრულდეს.

სსიპ საჯარო რეესტრის ეროვნულ სააგენტოში კომპანიის მფლობელებთან დაკავშირებით ინფორმაცია არ ფიქსირდება. დირექტორი კი გივი კვირიკაძეა.

აღნიშნული კომპანია შერჩევა შეფასების ეტაპზეა.