– თბილისი (GBC)საქართველოში კომერციული ბანკების მიერ გაცემული სესხები წლიურად 9.1%-ით გაიზარდა 2022 წლის მაისში (-0.1% თ/თ), წინა თვის 7.5%-იანი ზრდის შემდეგ, და 43.1 მლრდ ლარი შეადგინა. ამის შესახებ "Galt & Taggart"–ის კვირის მიმოხილვაშია ნათქვამი, რომელიც ორშაბათს, 4 ივლისს გამოქვეყნდა.

მიმოხილვის თანახმად, გაცვლითი კურსის ეფექტის გამორიცხვით, სესხების პორტფელის წლიურმა ზრდამ მაისში 18.1% შეადგინა (+1.3% თ/თ), აპრილის 17.9%-იანი ზრდის შემდეგ.

სექტორების მიხედვით, მაისში გაცვლითი კურსის ეფექტის გამორიცხვით, კორპორაციული დაკრედიტების წლიურმა ზრდამ 15.7% შეადგინა, წინა თვის 15.8%-იანი ზრდის შემდეგ, ხოლო საცალო დაკრედიტება წლიურად 20.4%-ით გაიზარდა (19.9% წ/წ იყო წინა თვეში). ამასთან, იპოთეკური სესხების პორტფელის წლიური ზრდა 13.9% იყო მაისში, წინა თვის 13.5%- იანი ზრდის შემდეგ.

2022 წლის მაისში სესხების დოლარიზაცია 48.7%-მდე შემცირდა (-5.22პპ წ/წ და -0.87პპ თ/თ), ხოლო უმოქმედო სესხებმა 2.0% (-0.39პპ წ/წ და უცვლელი თ/თ) შეადგინა.

საბანკო სექტორში განთავსებული დეპოზიტების წლიური ზრდა 13.1%-მდე შენელდა 2022 წლის მაისში, წინა თვეში დაფიქსირებული 14.1%-იანი ზრდის შემდეგ გაცვლითი კურსის ეფექტის გამორიცხვით და 37.2 მლრდ ლარი შეადგინა. ვალუტების მიხედვით, მაისში ლარის დეპოზიტების წლიური ზრდა 11.8%-მდე შენელდა (13.6% წ/წ იყო წინა თვეში), ხოლო უცხოური ვალუტის დეპოზიტების წლიურმა ზრდამ გაცვლითი კურსის ეფექტის გამორიცხვით 13.9% შეადგინა (14.5% წ/წ იყო წინა თვეში). ამასთან, მაისში დეპოზიტების დოლარიზაცია 58.1%-მდე შემცირდა (-2.57პპ წ/წ და -1.33პპ თ/თ).