თბილისი (GBC) – ფრანგულმა კომპანიამ Thales Group, რომელიც რუსეთში 20 ბანკს უწევდა მომსახურებას გადახდების დაცვისა და PIN-კოდების შემოწმებაში, რუსეთის ბაზარზე მუშაობა შეწყვიტა. ამის შესახებ Forbes-ს კომპანიის წარმომადგენელმა უთხრა.

ინფორმაციის წყაროს ცნობით, Thales Group არ არის ერთადერთი კომპანია, რომელიც რუსეთის საფინანსო ბაზარს HSM-მოდულებს აწვდიდა, რომლებიც ტრანსაქციებისა და ბანკების კლიენტების მონაცემების დაცვისთვის გამოიყენება. ანალოგიურ მომსახურებას უწევდა ბანკებს ამერიკული კომპანია Entrust.

Thales–ის რუსული ანალოგებია CryptoPro და Infotecs. საფინანსო ბაზრის მონაწილეებმა რუსულ გამოცემა „კომერსანტს“ აცნობეს, რომ უცხოური HSM-მოდულების ჩანაცვლების შესახებ გადაწყვეტილება ცენტრალურ ბანკში 15 აპრილს ბანკირებთან შეხვედრაზე მიიღეს.