თბილისი (GBC) – ტრასეკას მარშრუტებზე სასაზღვრო გადასასვლელებსა და საზღვაო პორტებში საბაჟო პროცედურებისა და ფორმალობების ჰარმონიზაციის საკითხები ორგანიზაციის მიერ გამართულ ონლაინ სემინარზე განიხილეს.

ამის შესახებ ინფორმაცია ტრასეკას ოფიციალურ ვებგვერდზეა განთავსებული.

სემინარზე აზერბაიჯანის, ბულგარეთის, ყაზახეთის, ყირგიზეთის, მოლდოვას, რუმინეთის, ტაჯიკეთის, თურქეთის და უკრაინის საბაჟო სამსახურების წარმომადგენლები იყვნენ მიწვეული. ორგანიზაციის მიერ გავრცელებულ ინფორმაციაში საქართველო ნახსენები არ არის.

სემინარის სპიკერებმა საბაჟო ტრანზიტის ჰარმონიზაციისა და გამარტივების საკითხებში გამოცდილება გაცვალეს და აქცენტები მულტიმოდალურ სატრანსპორტო ოპერაციებზე გააკეთეს. ასევე ისაუბრეს საბაჟო ორგანოებს შორის ინფორმაციის სისტემატური გაცვლის საჭიროებაზე.

როგორც ცნობილია, ტრასეკას მარშრუტებისთვის, რომლებიც ევროპას, კავკასიას და აზიას აკავშირებს ერთმანეთთან, დამახასიათებელია ტრანზიტული ქვეყნების გავლით სასაზღვრო გადასასვლელებზე, პორტებში გაფორმებებისთვის დროის დანაკარგები. ასევე, გარკვეული ფორმალობების დაცვაა საჭირო, როდესაც ტრანსპორტის სახეობის ცვლილება ხდება – ამ შემთხვევაშიც საჭიროა დოკუმენტების გაფორმება და საბაჟო პროცედურების გავლა.

ზოგადად პროცედურების ჰარმონიზაცია და გამარტივება, საბაჟო ტრანზიტის რეჟიმების ეფექტიანობის გაზრდა, საზღვრების გადაკვეთისთვის საჭირო ფორმალობების გამარტივება და საზღვაო პორტების ეფექტიანობის ამაღლება იყო ის ძირითადი საკითხები, რომლებიც ტრასეკას მარშრუტებზე გადაზიდვების გაუმჯობესებას უნდა მოემსახუროს.