თბილისი(GBC) - McDonald's მემკვიდრე რესტორნების ქსელი „გემრიელია – და წერტილი“ (Вкусно - и точка) აცხადებს, რომ განახლებული ქსელის პირველი რესტორნები სანკტ–პეტერბურგში დაიწყებენ მუშაობას. კვირის ბოლომდე სანკტ–პეტერბურგსა და ლენინგრადის ოლქში სულ 30 რესტორნის გახსნა იგეგმება. „მოხარული ვართ გაცნობოთ, რომ ხვალ, 22 ივნისს, სანკტ–პეტერბურგსა და ლენინგრადის ოლქში მუშაობას განაახლებს „გემრიელია – და წერტილის“ 14 რესტორანი. რესტორნები მომხმარებლებს 10:30 საათიდან მიიღებენ“, – განაცხადეს კომპანიის პრეს–ცენტრში. კომპანიაში აღნიშნავენ, რომ ეს პირველი ქსელია, რომელიც რუსეთის დედაქალაქის მიღმა გაიხსნება.