თბილისი (GBC) - „გრინ ენერჯი“ უახლოეს მომავალში 1.1 მგვტ დადგმული სიმძლავრის მზის ელექტროსადგურს ექსპლუატაციაში მიიღებს.

სადგურს კომპანია კასპში აშენებს. 2000-მდე მზის პანელი, რომელიც 1.6 ჰა-ზეა დამონტაჟებული, წლიურად 1 400 000 კვტ.სთ ელექტროენერგიას გამოიმუშავებს. პანელების ნაწილის დამონტაჟება უკვე დასრულებულია და სადგური ამჟამად 500 კვტ სიმძლავრის დატვირთვით ოპერირებს. პროექტის ღირებულება $610 000-ია.

გამომუშავებული განახლებადი ელექტროენერგიით პლასტიკის და ენერგოეფექტური კერამიკული აგურის საწარმოები მარაგდება. 

„გრინ ენერჯი“ კერძო და ინდუსტრიული მზის ელექტროსადგურების პროექტირებას და მშენებლობას 2017 წლიდან ეწევა. კომპანიას საქართველოში 5 მეგავატამდე დადგმული სიმძლავრის კომერციული და საყოფაცხოვრებო მზის ელექტროსადგურები აქვს დამონტაჟებული. „გრინ ენერჯი“ აზერბაიჯანშიც საქმიანობს, სადაც 25 მგვტ-მდე დადგმული სიმძლავრის მზის სადგურები აქვს აშენებული.

„გვსურს ჩვენი წვლილი შევიტანოთ ქვეყანაში “მწვანე ეკონომიკის” განვითარებაში და მაქსიმალურად დავიცვათ ჩვენი ბუნებრივი გარემო“ - აცხადებს დავით შვანგირაძე, კომპანიის დამფუძლებელი.