თბილისი (GBC) - აპრილის 12.8%-იანი ინფლაციური მაჩვენებლის გამოქვეყნების პარალელურად, ეროვნული ბანკის (სებ) მოლოდინი გაუარესდა და  საშუალო წლიური ინფლაციის პროგნოზი 9%-დან 9.5%-მდე გაზარდა. 
 
"რუსეთიც და უკრაინაც მნიშვნელოვანი პარტნიორები და სამომხმარებლო პროდუქტების მომწოდებლები არიან, ნავთობი, მზესუმზირის ზეთი, სხვადასხვა საკვები პროდუქტები. აქედან გამომდინარე, ამ პროდუქტების ჩანაცვლება საკმაოდ რთულია და უფრო ძვირი პროდუქტებით ხდება", - აცხადებს სებ-ის პრეზიდენტი, კობა გვენეტაძე. 

"იმ პროგნოზით, რაც დღევანდელ დღეს გვაქვს, ვფიქრობთ, რომ საშუალო ინფლაცია დაახლოებით 9.5%-ის ფარგლებში იქნება წელს და შემდეგ დაიწყებს შემცირებას", - პროგნოზირებს გვენეტაძე.   

შეგახსენებთ, სებ-ი რუსეთ-უკრაინის ომის დაწყებამდე, გასული წლის ბოლოს, 2022 წლის საშუალო წლოურ ინფლაციას 7.1%-ზე პროგნოზირებდა. ომის დაწყების შემდეგ, მარტში სებ-ს ახალი პროგნოზი არ გაუკეთებია, თუმცა უკვე აპრილში სებ-ის პრეზიდენტმა განახლებული და გაზრდილი 9%-იანი პროგნოზის შესახებ განაცხადა. 

შეგახსენებთ, იანვარში 13.9%-იანი ინფლაცია დაფიქსირდა, თებერვალში 13.7%, მარტში კი ომამდელი მოლოდინი გამართლდა და მაჩვენებელი  11.8%-მდე შემცირდა.