თბილისი (GBC) - გასული წლის სექტემბრიდან მიმდინარე წლის თებერვლის ჩათვლით დასაქმების პორტალ jobs.ge-ზე ჯამში 32 ათასზე მეტი ვაკანსია გამოქვეყნდა, რაც წინა წლის ანალოგიურ პერიოდთან შედარებით, 105%-ით მეტია, ხოლო 2019-2020 წლების ანალოგიურ პერიოდთან შედარებით კი 28%-ით მეტი. დასაქმების პორტალზე თვეში 5000-ზე მეტი ვაკანსია ქვეყნდება.

PMC-ს მიერ ჩატარებული კვლევის მიხედვით, დამსაქმებლების მხრიდან მაღალი ინტერესი ფიქსირდება ინფორმაციული ტექნოლოგიების მიმართულებით. სექტემბრიდან- თებერვლის ჩათვლით მსგავსი ვაკანსიების რაოდენობა წლიურად 40%-ზე მეტად გაიზარდა და 2000-ს გადააჭარბა.

7252 ვაკანსია გამოქვეყნდა ადმინისტრატორი/მენეჯერის პოზიციაზე. ეს ციფრი კი წინა წლის ანალოგიურ პერიოდს 123%-ით აღემატება, ხოლო 2019-2020 წელს კი 35%-ით.

ყველაზე ხშირად დამსაქმებლები ლოგისტიკის მიმართულებით ეძებენ კადრებს. სექტემბერ-თებერვალში მსგავსი სფეროს მიმართულებით 10 ათასზე მეტი ვაკანსია გამოქვეყნდა. წლიურად ეს მაჩვენებელი 129%-ით გაიზარდა, ხოლო პანდემიის დაწყებამდე პერიოდთან შედარებით ზრდა 22%-ია.

ტრადიციულად მაღალია მოთხოვნა გაყიდვების მიმართულებით. გაყიდვების სფეროს მიმრთულებით დასაქმების პორტალებზე თვეში საშუალოდ 1500 ვაკანსია ქვეყნდება.

თებერვალში ყველაზე მეტი ვაკანსია კი შემდეგი მიმართულებით გამოქვეყნდა - ლოგისტიკა - 1761; გაყიდვები - 1496; ადმინისტრატორი/მენეჯერი - 1161; ფინანსები - 785; ინფორმაციული ტექნოლოგიები - 417.