Tbilisi (GBC) – ერთიანი ნაციონალური მოძრაობის დეპუტატო რომან გოცირიძე „„ჯორჯიან ეარვეისი“-ის მხრიდან რუსული საანგარიშსწორებო სისტემა “მირში” ჩართვას გამოეხმაურა.

კერძოდ, მან გაავრცელა Facebook-ში შემდეგი შინაარსის განცხადება:

„7 მარტს „ჯორჯიან ეარვეისი” ჩაერთო რუსულ საანგარიშსწორებო სისტემა “მირში”. ავიაკომპანიის საიტზე ვიზასა და მასტერქარდს ეს რუსული საბარათო სისტემაც დაემატა და უკვე დაიწყო მისი მეშვეობით ავიაბილეთების გაყიდვა.

რუსეთისადმი საერთაშორისო ფინანსური სანქციების დაწესების შემდეგ, “მირი” ქვეყნის შიგნით და დსთ-ს ზოგიერთ სახელმწიფოში რუსეთის ფიზიკური და იურიდიულიპირების მიერ თანხების გადარიცხვის და პლასტიკური ბარათებით ანგარიშსწორების განხორციელების ერთადერთი საშუალებაა. ქართული ავიაკომპანია ამ ქმედებით ფაქტობრივად ხელს უწყობს რუსეთის მოქალაქეებს საერთაშორისო თანამეგობრობის მიერ დაწესებული უპრეცედენტო სანქციების გვერდის ავლაში.

განსაკუთრებით საყურადღებოა ის ფაქტი, რომ „ჯორჯიან ეარვეისი“ კომერციულ ურთიერთობებს ამყარებს ისეთ რუსულ საანგარიშწორებო სისტემასტან, რომელიც არღვევს საქართველოს კანონს ოკუპირებული ტერიტორიების შესახე. „მირმა“ 2019 წელს ოკუპირებული აფხაზეთის ტერიტორიაზე დაიწყო უკანონო ფინანსური საქმიანობის განახორციელება.

„ოკუპირებული ტერიტორიების შესახებ“ კანონის მეხუთე და მეექვსე მუხლის თანახმად, ოკუპირებულ ტერიტორიაზე საქართველოს მთავრობის ნებართვის გარეშე უძრავი ქონების შეძენა და ასევე, ნებისმიერი სახის ეკონომიკური საქმიანობა არის აკრძალული.

საქართველოს სისხლის სამართლის კოდექსის 322(2) მუხლის თანახმად, „ოკუპირებული ტერიტორიების შესახებ“ საქართველოს კანონით აკრძალული ეკონომიკური საქმიანობის განხორციელება ისჯება ჯარიმით ან თავისუფლების აღკვეთით სამიდან ხუთ წლამდე ვადით. იგივე ქმედება, ჩადენილი: ა)ჯგუფურად; ბ)არაერთგზის; გ)ასეთი დანაშაულისთვის მსჯავრდებულის მიერ, ისჯება ჯარიმით ან თავისუფლების აღკვეთით ოთხიდან ექვს წლამდე ვადით.

საქართველოს მთავრობამ დაუყოვნებლივ უნდა მოახდინოს აღნიშნულ ფაქტზე რეაგირება, უნდა მიმართოს შესაბამის საერთაშორისო ორგანიზაციებს, მათ შორის ფულის გათეთრების წინააღმდეგ ფინანსურ ქმედებათა ჯგუფს(FATF), რათა აღიკვეთოს ოკუპირებულ აფხაზეთში ამ რუსული საგადახდო სისტემის უკანონო საქმიანობა. “აირზენამ” უნდა შეწყვიტოს ამ კანონდამრღვევ რუსულ კომპანიასთან ურთიერთობა“ - ნათქვამია განცხადებაში.