თბილისი (GBC) - 2022 წლის თებერვალში წინა თვესთან შედარებით ინფლაციის დონემ საქართველოში 0.9%, ხოლო წლიური ინფლაციის დონემ 13.7% შეადგინა.

რაც შეეხება საბაზო ინფლაციას , აღნიშნულმა მაჩვენებელმა 2022 წლის თებერვალში, გასული წლის შესაბამის პერიოდთან შედარებით 5.1% შეადგინა, ხოლო თამბაქოს გარეშე წლიური საბაზო ინფლაციის  მაჩვენებელი ასევე 5.1%-ით განისაზღვრა.

ყოველთვიური ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე: სურსათი და უალკოჰოლო სასმელები: ჯგუფში ფასები გაიზარდა 2.1%-ით, რაც თვის ინფლაციაზე 0.67 პროცენტული პუნქტით აისახა.

ფასები მომატებულია შემდეგ ქვეჯგუფებზე: ბოსტნეული და ბაღჩეული (10.8%), მინერალური და წყაროს წყალი, უალკოჰოლო სასმელები და ნატურალური წვენები (6.8%), შაქარი, ჯემი და სხვა ტკბილეული (3.1%), ზეთი და ცხიმი (3.0%), ყავა, ჩაი და კაკაო (2.7 %), პური და პურპროდუქტები (1.7 %); თევზეული (1.4 %).

ამასთან, ფასები შემცირდა რძის, ყველისა და კვერცხის ქვეჯგუფზე (-2.7%); ტრანსპორტის ჯგუფში ფასები გაიზარდა 1.0 %, რაც 0.12 პროცენტული პუნქტით აისახა მთლიანი ინდექსის ზრდაზე.

ფასები, ძირითადად, მომატებულია სატრანსპორტო მომსახურების ქვეჯგუფზე (3.8%); ალკოჰოლური სასმელები, თამბაქო: ჯგუფში ფასები გაიზარდა 1.3%-ით, რაც 0.09 პროცენტული პუნქტით აისახა თვის ინდექსზე.

ფასები გაიზარდა როგორც ალკოჰოლურ სასმელებზე (2.0%), ისე თამბაქოს ნაწარმზე (0.5 %); ტანსაცმელი და ფეხსაცმელი: ჯგუფში დაფიქსირდა ფასების 4.1 %-ანი  კლება, რაც თვის ინფლაციაზე -0.15 პროცენტული პუნქტით აისახა.

ფასები შემცირდა როგორც ფეხსაცმლის (-7.4%), ისე ტანსაცმლის (-2.6 %) ქვეჯგუფებზე.