თბილისი (GBC) – 2 მარტს დილით ნავთობის საერთაშორისო ფასები 5%-ით გაიზარდა და 2014 წლის 4 ივლისის მაქსიმუმს მიაღწია. Brent-ის სახეობის შავი ოქროს ღირებულებამ 110 დოლარს,

WTI-ს კი 108 დოლარს გადააჭარბა. ფასების ზრდის მიზეზია ნეგატიური მოლოდინები რუსულ ნავთობთან დაკავშირებით - პირველ რიგში ის, რომ ევროკავშირი და აშშ არ გამორიცხავენ სანქციების დაწესებას რუსული ენერგოსექტორის წინააღმდეგ, რაც საერთაშორისო ბაზარზე მწვავე დეფიციტს გამოიწვევს.

ასევე შესაძლოა რუსული ნავთობის დიდი ნაწილის ექსპორტი ევროპაში შეწყდეს იმის გამო, რომ რუსული საბანკო სისტემის დიდი ნაწილი SWIFT-იდან გაითიშება, რაც გამოიწვევს მისი გაყიდვების შემცირებას. ნეგატიურ მოლოდინებს ასევე ამძაფრებს რუსული ნავთობსექტორიდან ისეთი მსხვილი საერთაშორისო მოთამაშეების გასვლა, როგორც BP, Shell, Equinor, OMV, Exxon Mobil.