თბილისი (GBC) –22 თებერვალს დილიდან რუსეთის მხრიდან უკრაინაში შეჭრის ფონზე მკვეთრად ძვირდება ნავთობი - კერძოდ, ზრდამ 3% შეადგინა, და შავი ოქრო 2014 წლის 30 სექტემბრის შემდეგ პირველად ბარელზე 97 დოლარს გადააჭარბა.

ნავთობის ფასების ზრდას რუსულ-უკრაინული კონფლიქტის გარდა ხელს უწყობს ასევე საუდის არაბეთის სახელმწიფო ნავთობკომპანია Saudi Aramco-ის განცხადება ნავთობზე მოთხოვნის ზრდის თაობაზე. საქართველოს ნავთობპროდუქტების იმპორტიორთა კავშირის ხელმძღვანელის ვანო მთვრალაშვილის თქმით, თუ ნავთობის საერთაშორისო ფასი 100 დოლარამდე გაიზრდება, ეს გამოიწვევს ყველაზე იაფი და მოთხოვნადი ბენზინის - რეგულარის - გაძვირებას საქართველოში ლიტრზე 3,5 ლარამდე.

ამ ეტაპზე ნავთობის საერთაშორისო ფასი თითქმის მიუახლოვდა კრიტიკულ ზღვარს - 100 დოლარს, და შესაძლოა, დასავლეთის მიერ რუსეთის წინააღმდეგ სანქციების გამკაცრების შემთხვევაში ამ ნიშნულს გადასცდეს კიდეც. ამ ვითარებაში საწვავის მორიგი გაძვირება გარდაუვალი იქნება.