თბილისი (GBC)  - საქსტატის ცნობით, 2022 წლის იანვარში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 1 110.5 მლნ. აშშ დოლარი შეადგინა, რაც წინა წლის შესაბამის პერიოდთან შედარებით 41.2 პროცენტით მეტია.

 ამავე მონაცემებით,  აქედან ექსპორტი 331.3 მლნ. აშშ დოლარს შეადგენს, ანუ 47.6 პროცენტით გაიზარდა, ხოლო იმპორტი 779.1 მლნ. აშშ დოლარს, რაც გასული წლის იგივე პერიოდთან შედარებით 38.7 პროცენტით მეტია.

ეკონომიკის მინისტრის ლევან დავითაშვილის თქმით, განასაკუთრებით მნიშვნელობა აქვს სუფთა ექსპორტის ზრდას.

„რეექსპორტის გარეშე, ექსპორტი 39%-ითაა გაზრდილი. ესაა წმინდა ექსპორტი, , რომელიც რეალურად საქართველოში გენერირებული დამატებით ღირებულებას ახდენს. რომელშიც საქართველოში წარმოებული პროდუქტების ექსპორტი იგულისხმება. ჩვენი ძირითადი სავაჭრო ქვეყნებია ყოფილი დსთ-ს ქვეყნები, ანუ ის სივრცე, სადაც ჩვენ დიდი სავაჭრო ურთიერთობები გვაქვს, თუმცა, მნიშვნელოვანი ზრდაა, მათ შორის, ევროკავშირის მიმართულებითაც, ასევე შორეული აღმოსავლეთის ქვეყნებში, ჩინეთში და სხვა", - აღნიშნა ლევან დავითაშვილმა.