თბილისი (GBC)- საქსტატის ინფორმაციით, 2021 წელს საქართველოდან ექსპორტზე გავიდა 99,1 მლნ. დოლარის წამლები, რაც ერთი შეხედვით მეტყველებს იმაზე, რომ ქვეყანას მძლავრი ფარმაცევტული წარმოება გააჩნია.

თუმცა, სინამდვილეში ეს ასე არაა - საქართველოდან ძირითადად ცენტრალური აზიის ქვეყნებში მართლაც გადის 99 მლნ. დოლარის მედიკამენტები, მაგრამ მათ შორის 81 მლნ. დოლარი რეექსპორტია.

მეტიც. ადგილობრივი ბრენდების ქვეშ გამოშვებული წამლებიც კი ხშირ შემთხვევაში იმპორტულია - მაგალითად, GMP-ს სავაჭრო ნიშნის ქვეშ იყიდება ცნობილი და პოპულარული ანტიბიოტიკი „აზიმაკი“, თუმცა, მას საქართველოსთან არანაირი შეხება არ გააჩნია - სინამდვილეში წამალი წარმოებულია რუმინეთში.

ეს ორივე ფაქტი მეტყველებს იმაზე, რომ პირველი შთაბეჭდილება არასწორია, და სინამდვილეში ფარმაცევტული წარმოება საქართველოში უკიდურესად სუსტი და განუვითარებელია.