თბილისი (GBC) – აფხაზეთის სახელმწიფო ენერგოკომპანია „ჩერნომორენერგო“-ს ტექნიკური სამმართველოს უფროსის რუსლან კვარჩიას თქმით, ენერგომომარაგებაში განრიგის შემოღება, და შემდეგ მისი გამკაცრება გამოწვეულია იმით, რომ რესპუბლიკაში მეტი ენერგია იხარჯება, ვიდრე რუსეთიდან შემოდის და ენგურ-ჰესზე იწარმოება.

„იანვარ-თებერვალში წესით უნდა დაგვეხარჯა 230 მლნ., ხოლო მარტში 180 მლნ, კვტ.ს ენერგია, მაგრამ ხარჯმა ეს მაჩვენებლებს მნიშვნელოვნად გადააჭარბა. ჩვენ ვერ მივიღებთ მეტ ენერგიას რუსეთიდან, რადგანაც ეს რაოდენობა უკვე შეთანხმებულია. ვვარაუდობდით, რომ საკმარისი იქნებოდა, მაგრამ მოხმარება იმდენად დიდი და უკონტროლოა, რომ ამაზე უკვე საუბარიც კი არ მიდის“ - განაცხადა მან.

მისი თქმით, ეს ძირითადად შეეხება აფხაზეთის დასავლეთ ნაწილს, ხოლო აღმოსავლეთ რეგიონები - ძირითადად, გალი და ოჩამჩირე - ენგურჰესიდან მარაგდება, სადაც საკმაოდ რთული მდგომარეობაა. „ჯავის წყალსაცავში მარაგი თითქმის კრიტიკულ დონეზეა, ამიტომაც მოგვიწია შეზღუდვების შემოღება, წინააღმდეგ შემთხვევაში ახლო მომავალში ელექტროსადგურის გაჩერება მოგვიწევს. იმედია, აპრილის ბოლოს-მაისში წყალდიდობების სეზონი დაიწყება, და მარაგი ნორმალურ დონემდე აღდგება“ - განაცხადა კვარჩიამ.

ელექტროენერგიის მიწოდების განრიგი აფხაზეთში 7 თებერვალს ამოქმედდა. ზამთრის სეზონი, კრიპტოვალუტების უკონტროლო მაინინგი, და ინფრასტრუქტურის მოძველება - ესაა დღევანდელი აფხაზეთის ენერგოსისტემის მთავარი პრობლემები.