თბილისი (GBC) - სარეიტინგო სააგენტო Fitch მიმდინარე წელს საქართველოში საშუალოდ 7%-იან ინფლაციას ელის. 2021 წელს ინფლაციის საშუალო დონე 9.6% იყო. ფასების ზრდის დონის შემცირებას სააგენტოს პროგნოზით 2022 წლის მეორე კვარტლიდან უნდა ველოდოთ.

შეგახსენებთ რომ ეროვნული ბანკის მიზნობრივი ინფლაციის დონე 3%-ია.

“დეკემბერში ინფლაციის დონემ 13.9% შეადგინა, რაც ძირითადად სურსათისა და კომუნალური გადასახადების ფასის ზრდამ გამოიწვია. ინფლაციის დონე სამიზნე 3%-იან მაჩვენებელს მნიშვნელოვნად აღემატება. ფასების ზრდის მოკლევადიანი მოლოდინების შესამცირებლად ეროვნულმა ბანკმა მონეტარული პოლიტიკა გაამკაცრა. ველით რომ ეროვნული ბანკი მაღალ რეფინანსირების განაკვეთს 2022 წლის განმავლობაშიც შეინარჩუნებს. ინფლაციის დონის შემცირებას 2022 წლის მეორე კვარტლიდან ველით. ჩვენი პროგნოზით მიმდინარე წელს საშუალო ინფლაცია 7% იქნება“, - წერს Fitch.