თბილისი (GBC) - 2021-ში საქართველომ ფულადი გზავნილების სახით რეკორდული თანხა 2.3 მლრდ დოლარზე მეტი მიიღო. აქედან 229.5 მლნ დოლარი საქართველოში დეკემბერში გადმოირიცხა რაც 1 თვის განმავლობაში ასევე რეკორდულად მაღალი მაჩვენებელია.

უცხოეთიდან საქართველოში ფულადი გზავნილების 95.2% იმ 21 უმსხვილეს პარტნიორ ქვეყანაზე მოდის, საიდანაც გზავნილების მოცულობა დეკემბერში თითოეულზე 1 მლნ აშშ დოლარს აღემატებოდა. იმავე 21 ქვეყანაზე გასული წლის დეკემბერში მთელი ფულადი გზავნილების 95.7% მოდიოდა.

ჩარიცხვებიდან ყველაზე დიდი წილი რუსეთზე მოდის. კერძოდ დეკემბერში რუსეთიდან საქართველოში 39.7 მლნ დოლარი შემოვიდა. მეორე ადგილზე იტალიაა საიდანაც 37.8 მლნ დოლარი ჩაირიცხა.

2021 წლის დეკემბერში საქართველოდან საზღვარგარეთ 33.3 მლნ აშშ დოლარი (103.3 მლნ ლარი) გადაიგზავნა, რაც 2020 წლის დეკემბერის (24.7 მლნ აშშ დოლარი) ანალოგიურ მაჩვენებელთან შედარებით 35.1%-ით მეტია.