თბილისი (GBC) - Galt & Taggart-ის პროგნოზით 2022 წლის მარტში ინფლაცია დაიწყებს შემცირებას და 2022 წლის მეორე ნახევრიდან, რეფინანსირების განაკვეთის შემცირებისთვის 2 პროცენტული პუნქტით, შესაბამისი რესურსი გაჩნდება.

Galt & Taggart -ის პროგნოზით, საშუალო ინფლაცია 2022 წელს 4.1%-ს შეადგენს, მაშინ როდესაც, სების პროგნოზი შედარებით პესიმისტურია და მათი მოლოდინი 7.1%-ია.

სავარაუდოა, რომ მარეგულირებელი გამკაცრებული მონეტარული პოლიტკის გაგრძელებას გეგმავს, მანამ სანამ ინფლაცია არ შემცირდება და ეს სავარაუდოდ 2022 წლის გაზაფხულზე მოხდება.

ამავე დროს, G&T აღნიშნავს, რომ 2021 წლის მონეტარული პოლიტიკის და უცხოურ ვალუტაში სესხზე რეგულაციების გამკაცრება ეფექტს 2022 წელს გამოიღებს, რაც თავის მხრივ დაკრედიტების ზრდას 11-13 % მდე შენელებს.

მათივე თქმით, საბაზო ინფლაციამ ბოლო 3 თვეში ზღვრული კლება დააფიქსირა და ნოემბერში 6.1%-ს მიაღწია, რაც მიუთითებს ფასების ზრდის დროებით ხასიათზე, შეზღუდული, მეორადი ფაქტორების გათვალისწინებით.

სებ-მა 8 დეკემბრის სხდომაზე რეფინანსირების განაკვეთი 0.5%-ული პუნქტით 10.5%-მდე გაზარდა. სებ-ი ინფლაციას საგარეო ფაქტორებს უკავშირებს და აცხადებს, რომ ინფლაცია გამოწვეულია მონეტარული პოლიტიკის მიღმა ფაქტორებით. სებ-ის განცხადებით მთლიან ინფლაციაში 9% გამოწვეულია ეგზოგენური ფაქტორებით.

2021 წლის ბოლოს G&T მშპ-ს ზრდას 10.5%-ის ფარგლებში ელის, ხოლო 2022 წელს 5%-ს.

G&T -ის განცხადებით, სურსათისა და ენერგიის გლობალური ინფლაცია, კომუნალური მომსახურების უფრო მაღალი ტარიფები, ლარის გაუფასურება და ადგილობრივი მოთხოვნის ზრდა იყო საქართველოში ინფლაციის მთავარი მამოძრავებელი ფაქტორი, რომელიც ნოემბერში 12.5%-ს შეადგენდა.