თბილისი (GBC) - საქსტატის მონაცემებით, 2021 წლის III კვარტალში საქართველოში საშუალო თვიური ნომინალური ხელფასი გასული წლის შესაბამის პერიოდთან შედარებით 10.4 პროცენტით (129.0 ლარით) გაიზარდა და 1 368.5 ლარი შეადგინა.

მართალია ნომინალურად ხელფასები მნიშვნელოვნად გაიზარდა, თუმცა ორნიშნა ინფლაციის გათვალისწინებით, რეალურ გამოხატულებაში შემცირება დაფიქსირდა. ამასთან, პროდუქციის ერთეულზე პერსონალის ხარჯი ამავე პერიოდში გაიზარდა, თუმცა მატება ინფლაციის 3%-იან სამიზნე მაჩვენებელზე დაბალი იყო. 

TBC Capital-ის მონაცემებით, მე-3 კვარტალში ნომინალური საშუალო ხელფასი, წინა წელთან შედარებით, 10.4%-ით გაიზარდა. თუმცა, ამავე პერიოდში ფასების 12.3%-იანი ზრდის გათვალისწინებით, რეალურ მაჩვენებლებში, საშუალო ხელფასი, წინა წლის მე-3 კვარტალთან შედარებით, 1.7%-ით შემცირდა. გამოდის რომ საანგარიშო პერიოდში ხელფასების ზრდის ტემპს ინფლაციამ გადააჭარბა. 

ხელფასების სტატისტიკას თუკი პანდემიამდელ მონაცემს შევადარებთ ვნახავთ რომ მისი მსყიდველუნარიანობა საშუალოდ 230 ლარით არის შემცირებული რადგან ორწლიან პერიოდში ინფლაცია 17%-ს აღწევს.