თბილისი (GBC) - ფიქსირებული ფართოზოლოვანი ინტერნეტ მომსახურების აბონენტების რაოდენობა აგვისტოში 3.4%-ით გაიზარდა და 959 ათასი შეადგინა. მზარდია პროვაიდერების შემოსავლებიც და ერთ თვეში კომპანიებმა 25.2 მლნ ლარის შემოსავალი მიიღეს, რაც წლიურად 11.2%-ით გაზრდილი მაჩვენებელია. კომუნიკაციების კომისიის მონაცემებით, აბონენტების რაოდენობა 2020 წლის აგვისტოსთან შედარებით 29 ათასით გაიზარდა. შემოსავალი 2020 წლის აგვისტოსთან შედარებით 2,5 მლნ. ლარით გაიზარდა.

აბონენტების რაოდენობის მიხედვით, ბაზრის ლიდერი ტრადიციულად მაგთია - მას მთლიანი ბაზრის 47% უკავია, თუმცა მონაცემი წლიურად 0.4%-ით არის შემცირებული. მეორე ადგილზე სილქნეტია 33.2%-ით, მესამეზე კი სქაიტელი 5.2%-ით. ბაზრის 4.1%-იანი წილის დაკავება შეძლო ახალი ქსელების ჯგუფმა.

შესაბამისად, შემოსავლების ყველაზე დიდ წილსაც მაგთი და სილქნეტი ინაწილებენ - მაგთიმ ერთ თვეში 11.8 მლნ ლარის შემოსავალი მიიღო - 1.1 მლნ-ით მეტი წლიურად, ხოლო სილქნეტმა 8.37 მლნ ლარის 0.5 მლნ ლარით მეტი წლიურად.

ახალი ქსელების ჯგუფის და სქაიტელის შემოსავლები კი ერთ თვეში მილიონ ლარს შეადგენს. შემოსავლებში პროცენტულად ყველაზე დიდი ზრდა - 44% - სქაიტელს უფიქსირდება.