თბილისი (GBC) - თავდაჯერებული ვართ რომ წლის ბოლოს 10%-იან ეკონომიკურ ზრდაზე გავალთ - ამბობს პრემიერ-მინისტრი ირაკლი ღარიბაშვილი. მისივე თქმით არამხოლოდ რეგიონში არამედ ევროპაშიც ყველაზე მაღალი ზრდა სწორედ საქართველოშია. თუმცა, პრემიერის ოპტიმიზმს არ იზიარებენ საერთაშორისო საფინანსო ინსტიტუტები, რომლებიც წელს საქართველოში ბევრად დაბალ ზრდას ვარაუდობენ. კერძოდ, ყველაზე მაღალი პროგნოზი ამ დროისთვის აზიის განვითარების ბანკს აქვს - 8.5%-ის ფარგლებში. 8%-იან ზრდას ელის მსოფლიო ბანკი, სავალუტო ფონდი კი ელის რომ წელს ზრდა 7.7% იქნება. 7.8%-იან ზრდას ელის საქართველოში Fitch.

რაც შეეხება მომდევნო წელს, ამ შემთხვევაშიც ყველაზე მაღალი პროგნოზი ADB-ის აქვს - 6.5%-ის ფარგლებში. მსოფლიო ბანკი მომდევნო წელს საქართველოში 5.5%-იან ზრდას ელის, IMF 5.8%-იანს, ხოლო სარეიტინგო სააგენტო Fitch 5.8%-იან. ამ შემთხვევაშიც მთავრობის გათვლები მეტად ოპტიმისტურია: ბიუჯეტის BDD დოკუმენტის ტანახმად, მომდევნო წელს საქართველოს ეკონომიკა 6%-ით გაიზრდება.