თბილისი (GBC) - აგვისტოში ინფლაცია 10-წლიან მაქსიმუმზეა და 12.8%-ია. 2021 წლის აგვისტოში წინა თვესთან შედარებით ინფლაციის დონემ 0.7% შეადგინა.

საბაზო ინფლაციამ 2021 წლის აგვისტოში, გასული წლის შესაბამის პერიოდთან შედარებით 6.7% შეადგინა, თამბაქოს გარეშე წლიური საბაზო ინფლაცია კი 6.8%.

ყველაზე მეტად ტრანსპორტის მომსახურება არის გაძვირებული 22.5%-ით, წლიურად 16.2%-ით არის მომატებული ფასები სურსათსა და უალკოჰოლო სასმელებზე; სახლის მოვლაზე, ავეჯსა და საოჯახო ნივთებზე - 12.6%-ით.

სურსათისა და უალკოჰოლო სასმელების ჯგუფში ფასები (16.2%) მატება წლიურ ინფლაციაზე 5.09%-ული პუნქტით აისახა. ფასები მომატებულია ზეთსა და ცხიმზე (43.9%), ბოსტნეულსა და ბაღჩეულზე (42.2%), რძე, ყველი და კვერცხი (17.3%), შაქარი, ჯემი და სხვა ტკბილეული (16.9%), პურ-პურპროდუქტები (13%), თევზეული (11.9%), მინერალური და წყაროს წყალი, უალკოჰოლო სასმელები და ნატურალური წვენები (11.5%), ხორცი და ხორცის პროდუქტები (8.3%), ყავა, ჩაი და კაკაო (6.8%), ხილი და ყურძენი (5.4%);

ტრანსპორტის ჯგუფში ფასები გაიზარდა 22.5%-ით, რაც 2.69%-ული პუნქტით აისახა მთლიანი ინდექსის ზრდაზე. ფასები გაიზარდა პირადი სატრანსპორტო საშუალებების ექსპლუატაციაზე (32.5%), სატრანსპორტო მომსახურებაზე (4.6%) და სატრანსპორტო საშუალებების შეძენაზე (2.9%);

საცხოვრებელი, წყალი, ელ.ენერგია, აირი: ჯგუფში დაფიქსირდა ფასების 11.6%-იანი მატება, რაც 1.75%-ული პუნქტით აისახა წლიურ ინფლაციაზე. ფასები გაიზარდა ქვეჯგუფებზე: ელექტროენერგია, აირი და სათბობის სხვა სახეები (13.5%), საცხოვრებლის მიმდინარე მოვლა და შეკეთება (7.1%), წყალმომარაგება და საცხოვრებელთან დაკავშირებული სხვა მომსახურება (4.5%);

ჯანმრთელობის დაცვის ჯგუფში ფასები მომატებულია 10.9%-ით. შესაბამისად, ჯგუფის წვლილმა წლიურ ინდექსში 0.85%-ული პუნქტი შეადგინა. ფასები გაზრდილია სამედიცინო პროდუქციის, აპარატურის და მოწყობილობის (17.9%), საავადმყოფოების მომსახურების (5.3 პროცენტი) და ამბულატორიული სამედიცინო მომსახურების (5%) ქვეჯგუფებზე.