თბილისი (GBC) - საქართველოს რკინიგზამ წლის პირველ ნახევარში ლარის გაუფასურების გამო 47.7 მლნ იზარალა. რკინიგზის ვალდებულებები უცხოურ ვალუტაშია, შესაბამისად სახელმწიფო კომპანიაზე ლარის გაუფასურება ნეგატიურ გავლენას ახდენს და მიუხედავად შემოსავლების ზრდისა კომპანია ფინანსურ კვარტალს კვლავ ზარალით ასრულებს.

რკინიგზამ 500 მლნ დოლარის ევრობონდის რეფინანსირება მიმდინარე წლის ზაფხულში დაასრულა, თუმცა წლის 6 თვეში კომპანიას საპროცენტო განაკვეთის გადახდა 18 მლნ დოლარი დაუჯდა.

ჯამში სახელმწიფო კომპანიამ წლის პირველი ნახევარი კვლავ ზარალით დაასრულა - რკინიზგის ზარალი 32 მლნ ლარს შეადგენს, რაც მნიშვნელოვნად ჩამოუვარდება გასული წლის ანალოგიურ პერიოდში მიღებულ წმინდა ფინანსურ ზარალს. კომპანიის შემოსავალი წლიურად 21.5%-ით გაიზარდა და 149 მლნ ლარს გადააჭარბა, რაც ძირითადად სატვირთო გადაზიდვების ზრდაზე მოდის. გადაზიდვები მკვეთრად არის გაზრდილი ჩინეთიდან.