თბილისი (GBC) - ივლისის თვის ეკონომიკური ზრდის მაჩვენებელი, საკმაოდ მაღალია – 9.9% (+10%Y.Y). ეს ნიშნავს, რომ დაჯამებულად 7m/2021-ის მონაცემებით, ეკონომიკა წლიურად 12.2%-ით გაზრდილია, - ზრდაა 2019 წლის შვიდ თვესთან შედარებითაც, რაც მინისტრს აძლევს რწმენას, რომ წელი ორნიშნულიან ზრდით დასრულდება.

"დარგობრივ ჭრილში ყველა მიმათულებით ზრდაა, განსაკუთრებით გადამამუშავებელი მრეწველობაში, ასევე სასტუმროები და რესტორნები, ანუ განთავსების და სტუმარ-მასპინძლობის ინდუსტრია, ასევე ვაჭრობა. მნიშვნელოვანი ერთ-ერთი მამოძრავებელი ძალა ეკონომიკური ზრდის არის ადგილობრივი ექსპორტი, რომელიც გაზრდილია თითქმის 50 პროცენტით, რაც ძალიან მნიშვნელოვანია. ეს არის დაკავშირებული ერთი მხრივ, იმასთან, რომ მომავლის იმედის განცდა და სტაბილურობის განცდა გაუჩნდათ ბიზნესებს. დიდი მონდომებით ახორციელებენ ახალ ინვესტიციებს, დებენ ახალ კონტრაქტებს, აფართოებენ ექსპორტის, აფართოებენ ვაჭრობის არეალს, აფართოებენ წარმოებებს, ხდება გადაიარაღება. ამაზე მეტყველებს ის ინტერესი, რითაც ბიზნესები მონაწილეობენ თუნდაც სახელმწიფო პროგრამებში და თქვენ იცით, რომ „აწარმოე საქართველოში“ პროგრამა კიდევ უფრო მეტად ფართოვდება", - განაცხადა ნათია თურნავამ.