თბილისი (GBC) - თანამედროვე ბიზნეს ცენტრებში ათვისებული ფართების მაჩვენებელი პანდემიამდელ პერიოდს ვერ ეწევა, თუმცა მაჩვენებელი მაინც გაუმჯობესებულია.

ამას მოწმობს Colliers Georgia-ს კვლევა, რომლის თანახმად 2021 წლის პირველ ნახევარში თბილისის თანამედროვე ბიზნეს ცენტრები 24-მა მოიჯარემ დატოვა, სამაგიეროდ კი 41 ახალი და განახლებული საიჯარო ხელშეკრულება დარეგისტრირდა.

გამოთავისუფლებული ფართის 7,000 კვ.მ-ია, ახლადდაკავებულის კი 19,000 კვ.მ.

ყველა კლასის ბიზნეს ცენტრში წმინდა ათვისებულმა ფართმა დაახლოებით 6,000 კვ.მ შეადგინა, ეს 41%-ით ნაკლებია 2019 წლის ანალოგიურ პერიოდთან შედარებით. შესაბამისად, პრეპანდემიურ პერიოდთან შედარებით, ბიზნეს ცენტრებზე მოთხოვნა 59%-ით აღდგა. სამაგიეროდ 2020 წლის მაჩვენებლთან შედარებით,  მოთხოვნა გაორმაგდა.

იჯარის ფასი, 2021 წლის პირველ ნახევარში 2019 წლის პირველ ნახევართან შედარებით, შემცირებულია ყველა კატეგორიის ცენტრებში, გამონაკლისი მხოლოდ C კლასის ბიზნეს ცენტრებია, სადაც ფასი კვ. მ-ზე 1.5%-ით გაიზარდა.

საშუალო შეწონილი იჯარა A კლასის ბიზნეს ცენტრებში კვ.მ-ზე 22.6 დოლარია (-1.3%); C კლასის ბიზნეს ცენტრებში 11.5 დოლარი (+1.5), არაკლასიფიცრებულ ბიზნეს ცენტრებში 13.9 დოლარი (+2.3%). B კლასის ბიზნეს ცენტრებში 13.4 დოლარი (-9.2) შეადგინა.