თბილისი (GBC) - საქართველო მსოფლიო საფოსტო კავშირის (UPU) ადმინისტრაციულ (CA) და საფოსტო საექსპლუატაციო (POC) საბჭოებში მეორე ვადით აირჩიეს. 

გაეროს სპეციალიზირებული ორგანიზაციის, მსოფლიო საფოსტო კავშირის (UPU) 27-ე კონგრესი 9-27 აგვისტოს კოტ დივუარის რესპუბლიკის ქალაქ აბიჯანში გაიმართა. მასში მონაწილეობდა ორგანიზაციის 192 წევრი სახელმწიფოს, მათ შორის, საქართველოს დელეგაცია.

საბჭოები, UPU-ს მომავალ კონგრესამდე 2025 წლამდე პერიოდში მსოფლიოში ფოსტის სფეროს განვითარების და სრულყოფის უზრუნველმყოფ UPU-ს ძირითადი არჩევითი ორგანოებია.

როგორც ეკონომიკის სამინისტროში განმარტავენ, ადმინისტრაციულ საბჭოში (CA) წევრობით მომავალი ოთხი წლის განმავლობაში საქართველო მნიშვნელოვანი გადაწყვეტილებების შემუშავებასა და მიღების პროცესის უშუალო მონაწილე იქნება.

საფოსტო საექსპლუატაციო საბჭოს (POC) წევრობით კი საქართველო მომდევნო ოთხი წლის განმავლობაში საფოსტო მომსახურებასთან დაკავშირებული საექსპლუატაციო, კომერციული, ტექნიკური და ეკონომიკური ხასიათის საკითხების შესწავლასა და რეკომენდაციების მომზადება/მიღების პროცესის უშუალო მონაწილე იქნება.