თბილისი (GBC) - ჩირის მწარმოებელი კომპანია „ჩიკორი“, პანდემიის მიუხედავად, უახლოეს მომავალში ასორტიმენტის გაფართოებას და წარმადობის ზრდას გეგმავს. ამავდროულად დაგეგმილია საექსპორტო გეოგრაფიის გაფართოებაც.

„ჩიკორის“ ცნობით, 2021 წლის პირველ ნახევარში გაყიდვები 2020 წლის ანალოგიურ პერიოდთან შედარებით 50%-ით არის გაზრდილი. ზრდა არც პანდემიურ 2020 წელს შეფერხებულა, წლიურად გაყიდვები 32%-ით გაიზარდა. „ჩიკორმა“ ახალი საექსპორტო პარტნიორებიც შეიძინა.

„ჩიკორში“ აღნიშნავენ, რომ სირთულეები COVID-19-ის გავრცელების შემდეგ, უპირველესად, ლოკალურ ბაზარზე გაჩნდა, თუმცა კომპანია გამოწვევებს მომზადებული შეხვდა.

„პანდემიის გამო, მომხმარებელი ერიდება სავაჭრო ობიექტებში სიარულს. ბუნებრივია, ეს ჩვენი პროდუქციის საცალო გაყიდვებზე აისახა. თუმცა, ეს სიტუაცია მეტ-ნაკლებად დავარეგულირეთ – დაახლოებით, 2 წლის წინ, მომხმარებლებს შევთავაზეთ ვებ გვერდი www.chikori.ge / ახალი მომსახურება – წონის ჩირი ადგილზე მიტანით,“ - განმარტავენ კომპანიაში.

„ჩიკორი“ კაპიტალის ზრდის კომპანია „სინერჯის“ პორტფელური კომპანიაა.