თბილისი (GBC) - TBC Capital-ის ინფორმაციით, დეპოზიტები 2021 წლის ივნისში 16.7%*-ით გაიზარდა, 35.3 მლრდ ლარამდე. წლიური (წ.წ) ზრდის ტემპი წინა თვესთან შედარებით 5.3 %პ-ით შემცირებულია. 

ზრდის შენელება ძირითადად ლარის დეპოზიტების (წ/წ +24.2%, შემცირებულია -13.2%პ-ით მაისთან შედარებით) მიერ არის გამოწვეული, ხოლო უცხოურ ვალუტაში დენომინირებული დეპოზიტების ზრდის ტემპი (წ/წ +12.2% წ/წ, შემცირებულია -1.5 %პ-ით მაისთან შედარებით) მხოლოდ მცირედით შენელდა. 

ამასთან, წინა თვესთან შედარებით დეპოზიტების დოლარიზაცია 0.7%პ-ით 60.1%-მდე შემცირდა, თუმცა მხოლოდ ლარის გამყარების გამო - გაცვლითი კურსის ეფექტის გამორიცხვით დოლარიზაციის მაჩვენებელი წინა თვესთან შედარებით 0.1 პპ-ით არის გაზრდილი.

ეროვნულ ვალუტაში საპროცენტო განაკვეთმა ზრდა განაგრძო და 10.0% შეადგინა, უცხოური ვალუტების დეპოზიტების საპროცენტო განაკვეთები კი კვლავ კლების ტენდენციას ინარჩუნებს და საშუალოდ 1.2%-მდე შემცირდა. 

შედეგად, უცხოური და ეროვნული ვალუტის დეპოზიტების საპროცენტო განაკვეთებს შორის სხვაობამ ისტორიულ მაქსიმუმს - 8.8%-ს მიაღწია. 

ეს მაჩვენებელი კიდევ უფრო მაღალია ფიზიკური პირებისთვის, სადაც სხვაობამ 9.6% შეადგინა.