თბილისი (GBC) - შავი ზღვის ვაჭრობისა და განვითარების ბანკის (BSTDB) 120 მლნ ლარის ღირებულების 3 წლიანი ობლიგაციები დროულად, 18 ივნისს ვაჭრობიდან მოიხსნა. (დაფარვის თარიღი 20/06/2021)

ობლიგაციები საქართველოს საფონდო ბირჟზე (სსბ) A კატეგორიის ლისტინგში 2018 წელს განთავსდა. განთავსების აგენტი კი თიბისი კაპიტალი იყო.

ობლიგაციების მცურავი საპროცენტო განაკვეთი (კუპონი) კი მიბმული იყო საქართველოს ეროვნული ბანკის 3 თვიან სადეპოზიტო სერტიფიკატის პროცენტს, პროცენტის კვარტალში ერთხელ გადახდით.

მოზიდული 120 მილიონით BSTDB -მ თიბისი ბანკი დააფინანსა, რომელიც თავის მხრივ ამ საკრედიტო ხაზიდან მცირე და საშუალო ბიზნესის  დაკრედიტებას მოახდენდა. 

BSTDB-მ ობლიგაციები მიმდინარე წლის 1Q-შიც დახურა. 2018 წლის 27 მარტს გამოშვებული 25 მლნ ლარის ღირებულების 3 წლიანი ობლიგაციები ვაჭრობიდან მიმდინარე წლის 26 მარტიდან მოიხსნა.  

აღნიშნული ობლიგაციებიც სსბ-ს A კატეგორიის ლისტინგში იყო. განთავსების აგენტი კი გალტ ენდ თაგარტი იყო.

25 მლნ-იანი ობლიგაციების კუპონის განაკვეთიც სებ-ის 91 დღიან სადეპოზიტო სერთიფიკატებზე იყო მიბმული, კვარტალური გადახდით.

BSTDB-ს ახლა მხოლოდ ერთი, 5 წლიანი 50 მლნ ლარის ღირებულების ობლიგაციები აქვს სსბ-ზე განთავსებული, რომელსაც დაფარვა 2023 წლის 27 ივნისს უწევს.

ობლიგაციები სსბ-ზე A კატეგორიის ლისტინგშია დაშვებული, განთავსების აგენტი ისევ გალთ ენდ თაგარტი იყო.

50 მლნ-იანი ობლიგაციების მცურავი საპროცენტო განაკვეთიც სებ-ის 3 თვიან სადეპოზიტო სერტიფიკატის პროცენტზეა მიბმული, პროცენტის კვარტალში ერთხელ გადახდით.