თბილისი (GBC) -  სილქნეტს პროფილური საქმიანობიდან შემოსავლები შეუმცირდა, უძრავი ქონების გაქირავებიდან კი გაეზარდა.

სატელეკომუნიკაციო კომპანიის Q1/2021 -ის ანგარიშით, 95.9 მლნ ლარის შემოსავლიდან, ₾10 მლნ-მდე არაკომერციულია, მათ შორის, ₾2.3 მლნ - იჯარიდან (+47%Y.Y); დამატებით ინტერნეტმომსახურებიდან  - ₾0.5 მლნ  (-17%Y.Y), როუმინგ სერვისებიდან - ₾0.428 მლნ (-61%Y.Y). შემოსავალი გაზრდილია ქსელზე დაშვების მომსახურებიდანაც + 14%Y.Y (მოცულობა - ₾ 5.9 მლნ).

 1Q21-ში სილქნეტის EBITDA-მ 50,2 მლნ ლარი შეადგინა. Q1/2020-თან შედარებით 3%-იანი გაუარესების მიზეზად $/₾ კურსის ცვლილება სახელდება.

კომპანიის კომერციული შემოსავლები 86,7 მლნ ლარს შეადგენს (-1%Y.Y). კლება პანდემიის გამო ტურიზმის შემცირებამ, ასევე „დარჩი სახლში“ პროგრამამ  განაპირობა.

61%-ით შემცირდა შემოსავალი როუმინგის სერვისებიდან, ხოლო 7%-ით მობილური ზარების სერვისიდან (Y.Y). ამავდროულად, მოსახლეობის უმეტესობის სახლში ყოფნას აქვს სატელეკომუნიკაციო კომპანიისთვის დადებითი შედეგებიც: 11%-ანი ზრდა შეინიშნება შემოსავალში მობილური ინტერნეტიდან (Y.Y).

აბონენეტების რაოდენობა ( ფიქსირებული ფართოზოლოვანი სეგმენტი -298 000 აბონენტი) გაზრდილია როგორც 2020-ის, ასევე 2019 წლის 1 კვარტალთან შედარებით.

ზრდაა მაუწყებლობის ტრანზიტის მომხმარებლებშიც (224 000 აბონენტი). მობილური სერვისების და ფიქსირებული ტელეფონის მომხმარებელთა რაოდენობა კი, პირიქით, შემცირებულია შესაბამისად 5% და 4%-ით.