თბილისი (GBC) - პანდემიამდე გარე ტურიზმის აქტივობით შექმნილი დამატებული ღირებულების წილი მთლიან შიდა პროდუქტში, ეროვნული ბანკის შეფასებით, 12.1 პროცენტს აღწევდა, მაშინ როდესაც ადგილობრივი ტურიზმის წილი ბოლო წლებში 2.5 პროცენტის ფარგლებში მერყეობდა . თუმცა პანდემიამ ეს პოზიტიური დინამიკა სრულიად შეცვალა. 

კერძოდ, გარე ტურიზმის წილი ეკონომიკაში 2%-მდე, ხოლო შიდა ტურიზმის წილი 2.3%-მდე შემცირდა. 

2019 წელს, ისეთმა დარგებმა, როგორებიცაა განთავსების საშუალებებით უზრუნველყოფის და საკვების მიწოდების საქმიანობა (რეალური ზრდა 18.5 პროცენტი), უძრავი ქონებისა (რეალური ზრდა 4.1 პროცენტი) და ტრანსპორტის (რეალური ზრდა 8.4 პროცენტი) სფეროები, სადაც უცხოელ ვიზიტორთა მონაწილეობა საკმაოდ მაღალია, რეალური მშპ-ს 5 პროცენტიან ზრდაში 1.6 პროცენტული პუნქტის წვლილი შეიტანა. ხოლო 2020 წელს მათი ზრდის ტემპი და, შესაბამისად, ზრდაში წვლილები, უარყოფითი გახდა. 

„ მთლიანობაში, 2020 წელს რეალური მშპ 6.2 პროცენტით შემცირდა, რაშიც წმინდა ექსპორტის წვლილი -9.8 პროცენტული პუნქტი იყო. ეს შემცირება კი, უმეტესწილად, მომსახურების ექსპორტის მკვეთრ კლებას უკავშირდება, რაც, უმთავრესად, საერთაშორისო მოგზაურებისგან შემოსავლების მიღების შეწყვეტამ გამოიწვია. რაც შეეხება ეკონომიკურ დარგებს, რომლებშიც უცხოელ ვიზიტორთა მონაწილეობა, როგორც წესი, საკმაოდ მაღალია, 2020 წელს აქაც მნიშვნელოვანი კლება დაფიქსირდა. მაგ: განთავსების საშუალებებით უზრუნველყოფის და საკვების მიწოდების დარგის რეალური ზრდა -37.9 პროცენტი იყო, უძრავ ქონებასთან დაკავშირებული საქმიანობების რეალური ზრდა -0.1 პროცენტი იყო; ტრანსპორტის კი - -22.3 პროცენტი. ხოლო რეალური მშპ-ს 6.2 პროცენტიან კლებაში მათ -3.0 პროცენტული პუნქტის წვლილი შეიტანეს“, - განმარტავენ ეროვნულ ბანკში.