თბილისი (GBC) - საქართველოში ვენახის 1 ჰექტარზე  გაშენება  დაახლოებით 15-20 ათასი დოლარი ჯდება. თუ მევენახე მარნის მოწყობასაც განიზრახავს, დამატებით, დაახლოებით, 20-25 ათასი დოლარიც დასჭირდება.„ელკანას“ კონსულტანტის და მევენახეობა-მეღვინეობის მკვლევარის გიორგი ბარისაშვილის ინფორმაციით, ვენახი სრულ მოსავალს გაშენებიდან 4-5 წელში იძლევა და ეს ჰექტარზე დაახლოებით 8 ტონა ყურძენს, ანუ  6-7 ათას ბოთლ ღვინოს ნიშნავს.  თუ  გავითვალისწინებთ იმ გარემოებას, რომ 1 ბოთლ ღვინოზე სუფთა მოგება ევროპის ბაზარზე ყველა ხარჯის გამოკლებით 20-25 ლარია, გამოვა, რომ  6 ათასი ბოთლის გაყიდვის შემთხვევაში მიღებული შემოსავალი დაახლოებით   120 ათას დოლარს მიაღწევს.

„თიბისი კაპიტალის“ მიერ გამოქვეყნებული კვლევის თანახმად,საქართველო ვენახების საერთო ფართობით მსოფლიოში 22-ე, ხოლო ღვინის წარმოებით მე-19 ადგილს იკავებს. ამავე კვლევის მიხედვით,ადგილობრივი ღვინის მოხმარება საქართველოში 0.59 მლ ჰექტოლიტრს (2019) შეადგენს, რაც წარმოებაზე 3 ჯერ ნაკლებია და ექსპორტის მთავარ მნიშვნელობაზე მიუთითებს.ღვინის ეროვნული სააგენტოს ინფორმაციით,2021 წლის პირველ კვარტლში, ღვინის ექსპორტის რაოდენობრივი მაჩვენებელი 2%-ით აღემატება 2020 წლის ანალოგიური პერიოდის მაჩვენებელს, თუმცა, ექსპორტით მიღებული შემოსავლები 5%-ით ნაკლებია.ექსპორტი გაიზარდა ქართული ღვინის სტრატეგიულ ბაზრებზე:  ჩინეთი - 29% (959,040 ბოთლი), ლიეტუვა - 38% (245,940 ბოთლი), აშშ - 3% (237,878 ბოთლი), ესტონეთი - 22% (161956 ბოთლი), იაპონია - 11% (51346 ბოთლი ) და დიდი ბრიტანეთ- 2% (117118 ბოთლი).