თბილისი (GBC) - თანამედროვე სავაჭროს ცენტრები, უძრავი ქონების სხვა სექტორების მსგავსად, მძიმე მდგომარეობაში აღმოჩნდნენ. ჯამურად, დაახლოებით 5 თვის განმავლობაში არ ფუნქციონირებდნენ. მკაცრი ჩაკეტვისას მესაკუთრეების უმეტესობა ტენანტებს საიჯარო გადასახადისგან ათავისუფლებდა. Colliers International Georgia-ს შეფასებით და მესაკუთრეებთან კონსულტაციების შედეგად, წინა წელთან შედარებით საცალო ვაჭრობის ბრუნვა 3-ჯერ შემცირდა.

2020 წლის II ნახევარში დაახლოებით 9 000 კვადრატული მეტრი ( მ² ) ფართი გამოთავისუფლდა. ამრიგად, წინასწარი მონაცემების მიხედვით, წმინდა ათვისებული ფართი 6 000 მ²-ია..

 2020 წელს, თანამედროვე სავაჭრო ცენტრებში საშუალო შეწონილი იჯარა უმნიშვნელოდ შემცირდა. მაჩვენებელმა 3%-ით დაიკლო და კვ.მ-ზე 18.3 აშშ დოლარს (დღგ-ს გარეშე) გაუტოლდა.

საშუალო შეწონილი იჯარისგან განსხვავებით, ვაკანტურობის კოეფიციენტმა უმნიშვნელო, თუმცა პოზიტიური ცვლილება განიცადა. 2019 წლის შემდეგ, კოეფიციენტი 1 პროცენტული მაჩვენებლით გაუმჯობესდა და 9%-ს გაუტოლდა. შემცირებული ვაკანტურობის კოეფიციენტი შესაძლოა დაკავშირებული იყოს City Mall Saburtalo, Gldani Mall-სა და City Mall Gldani-ში ფართის ათვისებასთან. ვაკანტური ფართი გაიზარდა Tbilisi Mall-ში, Merani Shoppin Gallery-სა და HomeMart-ში.

პეკინზე იჯარამ 9%-ით 32.6 აშშ დოლარამდე დაიკლო. აღმაშენებლის და ჭავჭავაძის გამზირზე აღნიშნული მაჩვენებელი 5% და 3%-ით შემცირდა,  კვ.მ-ზე 24.4 და 29 აშშ დოლარამდე. საშუალო შეწონილი იჯარა 6%-ით გაიზარდა რუსთაველზე.