თბილისი (GBC) - „მივიღეთ გადაწყვეტილება, მოიჯარეებისთვის 10 ჰა-ზე მეტი  სასოფლო მიწის გამოსყიდვის შეზღუდვა გაუქმდეს და გამოსასყიდ, „სახნავი“ კატეგორიის მიწებს დაემატოს სათიბებიც“, - ეკონომიკის მინისტრის თქმით, პოსტპანდემიურ პერიოდში მთავარი ამოცანა ეკონომიკაში მეტი ქონების ჩართვაა

"ფართოვდება ის მექანიზმი, რომლითაც მოიჯარეები შეიძენენ და გამოისყიდიან სასოფლო-სამეურნეო მიწის ნაკვეთებს, რაზეც წლების განმავლობაში, იჯარის პროცესში აქვთ გაშენებული მრავალწლიანი ნარგავები, ამუშავებენ მიწებს, მაგრამ, სამწუხაროდ, იმის გამო, რომ ეს არის სახელმწიფო საკუთრება და მხოლოდ იჯარის ხელშეკრულება აქვთ ხელთ, არ შეუძლიათ საბანკო დაფინანსების მოზიდვა, ასევე შეზღუდულები არიან,  რომ  მონაწილეობა მიიღონ სახელმწიფო პროგრამებში და შესაბამისად, უფრო ეფექტიანად გამოიყენონ ეს სიკეთე“ - აღნიშნა ნათია თურნავამ.

მოიჯარეები მიწას პირდაპირი გამოსყიდვის წესით, საბაზრო ფასად შეისყიდიან.

პროგრამაში შესული კიდევ 1 ცვლილებით, შესაძლებელია 2021 წლის 31 მარტის მდგომარეობით იჯარით გაცემული სახნავი და სათიბი მიწის ნაკვეთების გამოსყიდვაც (აქამდე ეს უფლება მხოლოდ 2020 წლის 23 იანვრამდე იჯარით გაცემულ ნაკვეთებზე ვრცელდებოდა).