თბილისი ( GBC) - ნამახვანის კაშხლის და წყალსაცავის მშენებლობა  არ დაიწყება, ჰესის უსაფრთხოებასა და გარემოზე ზემოქმედების შეფასების დამატებითი კვლევის გარეშე, რომელსაც ადგილობრივი და უცხოელი სპეციალისტები  ჩაატარებენ.

ეკონომიკის მინისტრის ნათია თურნავას განცხადებით, ინვესტორთან მიღწეულია შეთანხმება და სამშენებლო სამუშაოებს ქართველი დირექტორი უხელმძღვანელებს. რაც, თურნავას შეფასებით, სამშენებლო უსაფრთხიების ეკოლოგიური ნორმების და დასაქმებულთა უფლებების დაცვის ერთგვარი გარანტია.

ჰესის მშენებლის, სახელმწიფოსა და ინვესტორის კონტრიბუციით შეიქმნება 5 მილიონიანი ფონდი. თურნავას თქმით, ფონდში აკუმულირებული თანხები ცაგერის, ასევე წყალტუბოს რაიონების სოფლების საჭიროებებზე და ინფრასტრუქტურის მოწესრიგებაზე დაიხარჯება.

ჰესის მშენებლობაზე, ოპერირებასა და ფლობაზე გამოცხადებულ ტენდერში  ნორვეგიულმა  კომპანიამ CLEAN ENERGY GROUP გაიმარჯვა.CLEAN ENERGY GROUP-ი პროექტს თურქულ ENKA-სთან ერთად ახორციელებს, რომელიც თურქეთში ერთ-ერთი მსხვილი კომპანიაა და ქვეყნის გენერაციის 12%-ს ფლობს.ნამახვანის პროექტი მოიცავს ორი ჰესის მშენებლობას დადგმული სიმძლავრით 433 მგვტ.