თბილისი (GBC) - OPEC+ ფორმატის წევრი ქვეყნების მინისტერიალზე, რომელიც ხუთშაბათს, 4 მარტს გაიმართება, დღე–ღამეში ნავთობმოპოვების 500 ათასი ბარელით გაზრდის საკითხს განიხილავენ.

ორი დღის წინ იგივე ფორმატის ტექნიკურმა კომიტეტმა დაადგინა, რომ ნავთობმოპოვების შემცირებასთან დაკავშირებული გარიგების პირობები დეკემბერში 101%–ით შესრულდა. მათ შორის, OPEC-ის წევრმა ქვეყნება ეს შეთანხმება 104%–ით, ხოლო კარტელის არაწევრმა ქვეყნებმა – 95%–ით შეასრულეს. შესაბამისად, მოპოვების მოცულობის შემცირებამ შეთანხმებულს დღე–ღამეში 77 ათასი ბარელით გადააჭარბა. ნავთობმოპოვების თემაზე მინისტერიალისთვის ტექნიკური კომიტეტის რეკომენდაციების შესახებ ჯერ არაფერია ცნობილი.

მისასალმებელ სიტყვაში OPEC-ის გენერალურმა მდივანმა მოჰამედ ბარკინდომ თქვა, რომ კარტელის ანალიტიკოსების პროგნოზით, 2021 წელს მსოფლიო ეკონომიკა 4,4%–ით გაიზრდება, ხოლო კორონავირუსის საწინააღმდეგო ვაქცინაცია ეკონომიკის პერსპეტივევბის ზრდის შესაძლებლობას შექმნის.

გარდა ამისა, ზრდის ტენდენცია ნარჩუნდება აზიაში, განსაკუთრებით ჩინეთში. ჩინეთის ეკონომიკის აღდგენის საპროგნოზო მაჩვენებელი 2021 წლისვის 6,9%–ს შეადგენს.

კარტელის ანალიტიკოსები ვარაუდობენ, რომ 2021 წელს ნავთობზე მოთხოვნა მსოფლიოში, დღე–ღამეში 5,9 მლნ ბარელით გაიზრდება – 95,9 მლნ ბარელამდე დღე–ღამეში.

ამ ფონზე, ეტალონური მარკების ნავთობი მსოფლიო ბირჟებზე ძვირდება. თბილისის დროით 10:50 საათისთვის Brent-ის მარკის ნავთობი 0,62%–ითაა გაძვირებული და ბარელი $64,47 ღირს, ხოლო ერთი ბარელი WTI $61,57 ღირს (+0,47%).