თბილისი (GBC) - უმდიდრესი ამერიკელებისთვის მრავალმილიარდიანი გადასახადების დაწესება სურთ. ამერიკელი სენატორების ჯგუფმა, ელიზაბეტ უორენის ხელმძღვანელობით, უმდიდრესი მოქალაქეებისთვის გადასახადის დაწესების ინიციატივა გააჟღერა. სააგენტო Bloomberg-ის ცნობით, ამ წინადადებით ამერიკელი მილიარდერები ყოველწლიურად, შესაძლოა, მრავალმილიარდიანი გადასახადით დაიბეგრონ.

სენატორების ინიციატივა $50 მლნ–დან $1 მლრდ–მდე შემოსავლის მქონე პირების მთელი ქონების 2%–ით, ხოლო $1 მლრდ–ზე მეტი შემოსავლის მიღების შემთხვევაში – ქონების 3%–ით დაბეგვრას ითვალისწინებს. ინიციატივის ავტორების აზრით, ასეთი მოსაკრებელი ეკონომიკას უფრო სამართლიანს გახდის, ხოლო ქვეყნის ხაზინა 10 წელიწადში დამატებით $3 ტრილიონით შეივსება.

„გავლენიანმა და ულტრამდიდარმა ამერიკელებმა იმდენად მოირგეს კანონმდებლობა, რომ მოსახლეობის ყველაზე მდიდარი 0,1% უფრო ნაკლებად იბეგრება, ვიდრე დანარჩენი გადამხდელების 99%. და ეს მაშინ, როდესაც პანდემიის პერიოდში მილიარდერების შემოსავლები 40%–ით გაიზარდა“, – განაცხადა უორენმა.

Bloomberg წერს, რომ მიუხედავად მოყვანილი არგუმენტებისა, ინიციატივა კონგრესში საჭირო მხარდაჭერას ვერ მოიპოვებს, როგორც უორენის მიერ მანამდე გაჟღერებული ინიციატივების შემთხვევებში ხდებოდა.

ამასთან, Bloomberg–ის ანალიტიკოსები წერენ, რომ კანონპროექტის დამტკიცების შემთხვევაში 100 უმდიდრეს ამერიკელს 2021 წელს $78 მლრდ–ის გადახდა მოუწევთ.