თბილისი (GBC) - ირანისა და აზერბაიჯანის მთავრობებმა მხარი დაუჭირეს მდინარე არაზზე „გიზ გალასი“–სა და „ხუდაფერინის“ ჰიდროელექტროსადგურების მშენებლობის გაგრძელებას.

ირანული მედიის ცნობით, ამის შესახებ ირანში, ქალაქ თებრიზში (ირანის აღმოსავლეთ აზერბაიჯანის პროვინცია) გამართულ თათბირზე აღინიშნა.

ზემოხსენებულ ირანულ პროვინციასა და აზერბაიჯანის ჯებრაილის რაიონს შორის ჰესების მშენებლობა ირანის ენერგეტიკის სამინისტროს ერთ–ერთ მნიშვნელოვან პროექტად მიიჩნევა.

აზერბაიჯანი ამ ჰესებიდან ყოველწლიურად 368 მლნ კვტ/სთ ელენერგიას მიიღებს და 260 000 ჰა სასოფლო–სამეურნეო სავარგულებს უზრუნველყოფს სარწყავი წყლით.

ჰესების მშენებლობა 1989 წელს დაიწყო, თუმცა სამუშაოები მალევე შეწყდა მთიანი ყარაბაღის კონფლიქტის გამო.