თბილისი (GBC) - ღვინის ხარისხის გაუმჯობესების მიზნით, ყურძნის ხარისხიც გაკონტროლდება. კონტროლის გამკაცრება რთველი 2021-იდან იგეგმება.

გარემოს დაცვისა და სოფლის მეურნეობის სამინისტროს ცნობით, განისაზღვრება  ჩასაბარებელი ყურძნის შაქრიანობა, რომელიც შესაბამისი ნორმატიული დოკუმენტაციებითაა დადგენილი და  საბაზრო ღირებულებაზეც აისახება. გარდა ამისა, კონტროლი განხორციელდება ადგილწარმოშობის ჯიშების სპეციფიკაციებით განსაზღვრულ მოსავლიანობის ლიმიტზე.

გარემოს დაცვისა და სოფლის მეურნეობის მინისტრის მოადგილე ცვლილებების შესახებ ინფორმაციის მევენახე ფერმერებამდე დროულად მიწოდების მნიშვნელობაზე საუბრობს და განმარტავს, რომ ამ მიმართულებით აქტიურად იმუშავებენ სამინისტროს საინფორმაციო-საკონსულტაციო სამსახურები.

"ისინი ღვინის ეროვნული სააგენტოს წარმომადგენლებთან ერთად, უახლოეს დღეებში დაიწყებენ შეხვედრებს რეგიონებში, ადგილობრივი ხელისუფლების წარმომადგენლებთან და ფერმერებთან. გარდა ამისა, მიმდინარე წელს იგეგემება ვენახების კადასტრის პროგრამის დასრულება კახეთისა და რაჭა-ლეჩხუმის რეგიონებში, რაც მნიშვნელოვანია მევენახეობა-მეღვინეობის დარგის განვითარების და ხარისხიანი ღვინის წარმოების ხელშეწყობისთვის“, - ოთარ შამუგია  მინისტრის მოადგილე.

მისივე თქმით, ეს გადაწყვეტილება ქართული ღვინის საერთაშორისო რეპუტაციასა და საექსპორტო ფასზე დადებითად აისახება.