თბილისი (GBC) - ევროპარლამენტარები რუსეთს შეახსენებენ, რომ  ტერიტორიების ოკუპაციის და  კონფლიქტების გადახედვა მოუწევს. სტრასბურგში საქართველოს გამარჯვების შემდეგ, სამხრეთ ოსეთის და აფხაზეთის ოკუპაციის საკითხიც დადგება. " არ უნდა ველოდოთ რომ რუსეთი ადვილად შეიცვლის პოზიციას, მაგრამ ეს გარდაუვალია", - მიაჩნიათ ევროპარლამენტარებს. 

სტრასბურგის სასამართლოს დიდი პალატის მიერ 21 იანვარს გამოცხადებული გადაწყვეტილების თანახმად, საქართველოს სახელმწიფომ რუსეთის ფედერაციას მოუგო საქმე, რომელიც 2008 წლის აგვისტოს ომს უკავშირდება. მოსაზრებები ჩნდება  8-12.08.2008 პერიოდის  ჩანაწერზე, რუსეთის მხრიდან კონტროლის ნაწილში, სადაც აგრესორი მხოლოდ 1 პუნქტში მტყუნდება, რაც მკვლელობების გამოუძიებლობას გულისხმობს და აგვისტოს 5 დღე თითქოს რუსეთს რაღაც ფორას აძლევს, თავდამსხმელის სტატუსის შესამსუბუქებლად.

2008 წლის ომის საქმეზე სტრასბურგის სასამართლომ გადაწყვეტილება გამოაცხადა. ადამიანის უფლებათა ევროპულმა სასამართლო დაეთანხმა საქართველოს  მოთხოვნას, რომ რუსეთმა 2008 წლის აგვისტოს ომის დროს ადამიანის უფლებათა ევროპული კონვენციის არაერთი მუხლი დაარღვია.

·         სასამართლოს დიდი პალატის მიერ ამ დარღვევების აღიარებით დასტურდება, რომ 2008 წლის აგვისტოს ომის დროს რუსეთმა განახორციელა ქართველების ეთნიკური წმენდა.

·         სტრასბურგის სასამართლომ გაიზიარა საქართველოს პოზიცია და აღიარა რუსეთის პასუხისმგებლობა ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის.

·         სტრასბურგის სასამართლომ გაიზიარა საქართველოს პოზიცია და აღიარა რუსეთის პასუხისმგებლობა სამოქალაქო პირების თავისუფლებისა და უსაფრთხოების უფლების დარღვევისათვის.

·         სასამართლომ გაიზიარა საქართველოს პოზიცია და დაადგინა რუსეთის პასუხისმგებლობა ომის დროს საქართველოს მოქალაქეთა მკვლელობების გამოუძიებლობისათვის და სხვა არაერთი დარღვევისათვის.

ეს ისტორიული გადაწყვეტილება უმნიშვნელოვანესი ბერკეტია საქართველოსათვის  საერთაშორისო სამართლებრივი მექანიზმების გამოყენებით კონფლიქტების მოწესრიგებისა და ტერიტორიული მთლიანობის აღდგენისათვის.