თბილისი (GBC) - ბუნებრივი გაზის ფასი მაქსიმუმზე გავიდა. ევროპულ და აზიურ ბაზრებზე ცივმა ზამთარმა ბუნებრივი გაზის ფასი მაქსიმუმამდე გაზარდა, რის გამოც ევროპის მიწისქვეშა საცავებში „ცისფერი საწვავი“ რეკორდული სისწრაფით მცირდება.

ევროპის უმსხვილეს ჰაბზე, ნიდერლანდურ TTF-ზე ფასმა 1000 კბ/მ–ზე $252–ს მიაღწია, რაც მაქსიმუმია 2019 წლის იანვრის შემდეგ. ხოლო ესპანეთში, რომელიც დიდთოვლობამ მოიცვა, ჰაბზე PVB ფასი $645,84–მდე ავარდა.

აზიელი შემსყიდველები იძულებული არიან, კიდევ ეფრო მეტი გადაიხადონ. ჩრდილო–აღმოსავლეთ აზიაში 1000 კბ/მ ბუნებრვი გაზის ფასმა რეკორდულ $812–ს მიაღწია. საწვავის ფასის ზრდის დინამიკა დღეს უფრო სწრაფია, ვიდრე ეს 2011 წელს, იაპონიის ატომურ სადგურზე „ფუკუსიმა“ მომხდარი ავარიის შემდეგ ფიქსირდებოდა.

აზიაში ძირითადი პრობლემა გახდა გათხევადებული ბუნებრივი გაზის უკმარისობა, რომლის წარმოებაც შემცირდა ავსტრალიაში, ყატარში და მალაიზიაში. აშშ–დან ამ სახის ნედლეულის მიწოდება ვერ აკმაყოფილებს მოთხოვნას, ვინაიდან გაზმზიდი ტანკერები ვერ ასწრებენ იმ რაოდენობით ნედლეულის მიტანას გასაყიდ ობიექტებამდე.