თბილისი ( GBC) -BAG-ის ( საქართველოს ბიზნეს ასოციაცია)  წევრების უმრავლესობა (94%) თვლის, რომ COVID-19-ის გავლენა მათ ბიზნესაქტივობაზე ძალიან მნიშვნელოვანი ან მნიშვნელოვანია.მოთხოვნის კლების პარალელურად კომპანიებს შეუმცირდათ შეკვეთები და გაყიდვები. ხოლო, პანდემიის შესაკავებლად დაწესებული შეზღუდვები აფერხებენ ბიზნესსაქმიანობას. ეს კი, ბუნებრივია, აისახება კომპანიათა ფინანსურ მაჩვენებლებზე.     

აღსანიშნავია, რომ შემოსავლების კლების მიუხედავად, შედარებით მცირე იყო გავლენა დასაქმების მაჩვენებლებზე. გამოკითხულთა მხოლოდ 40%-ში შემცირდა დასაქმებულთა რაოდენობა, ხოლო 40-დან 27-მა პროცენტმა განაცხადა, რომ ეს კლება მთლიანი დასაქმების 20%-ს არ აღემატება. 

მრეწველობის სექტორში გამოკითხულ არცერთ კომპანიაში დასაქმებულთა რაოდენობა არ შემცირებულა. აღნიშნული მაჩვენებელი მშენებლობის სექტორში 16.7%-ს, ხოლო ვაჭრობის და მომსახურების სექტორებში - 52.9%-ს და 66.7%-ს შეადგენს, შესაბამისად.  

BAG ინდექსი ყოველკვარტალურად ქვეყნდება და აცნობს საზოგადოებას ბიზნესწრეებში არსებულ განწყობასა და მოლოდინს.