თბილისი (GBC) - კრედიტინფო საქართველომ საფინანსო სექტორის მიმოხილვა გამოაქვეყნა. ანგარიშის მიხედვით,  საქართველოში სესხით სარგებლობს 1.8 მლნ-მდე ადამიანი და ჯამში ₾27 მლრდ-ის აქტიური სესხია გაცემული, რომელიც წლის დასაწყისიდან ₾3.5 მლრდ-ით არის გაზრდილი. გარკვეულწილად გაუფასურებული ლარის ფონზე;

მსესხებლების 89% ბანკს მიმართავს და ეს წილი მიმდინარე წელს არ შეცვლილა; წლის დასაწყისიდან დღემდე მსესხებლების რაოდენობა გაზრდილია 4.7%-ით, ანუ 81,574 ადამიანით; ჯამური პორტფელის ვადაგადაცილების მაჩვენებელი  5.9%-ია.

ვადაგადაცილებული სესხების მოცულობა მისო-ებში უფრო მაღალია და საშუალოდ მათ მიერ გაცემული სესხების 18% ვადაგადაცილებულია. მაშინ, როდესაც საბანკო სექტორში ეს მაჩვენებელი 5%-ია. საშუალო სესხი ბანკში - ₾15,700 და მიკროსაფინანსო ორგანიზაციაში - ₾3,000

კომერციული ბანკების მიერ გაცემული სესხების მოცულობა (ბანკთაშორისი სესხების გარდა), 2020 წლის ოქტომბერში, წინა თვესთან შედარებით 31.86 მლნ ლარით (0.09%-ით) შემცირდა (გაცვლითი კურსის ეფექტის გარეშე, 0.89%-ით გაიზარდა) და მიმდინარე წლის პირველი ნოემბრისათვის 36.35 მლრდ ლარი შეადგინა.  ამავე პერიოდში ეროვნული ვალუტით გაცემული სესხების მოცულობა 468.32 მლნ ლარით (3.03%-ით) გაიზარდა, ხოლო უცხოური ვალუტით გაცემული სესხების მოცულობა 500.18 მლნ ლარით (2.39%-ით) შემცირდა (გაცვლითი კურსის ეფექტის გარეშე, შემცირდა 0.68%-ით).