აშშ–ის ვაჭრობის სამინისტრომ იმ რუსული და ჩინური საწარმოების სია გამოაქვეყნა, რომლებიც სანქციების ქვეშ მოექცნენ. ისინი ამ ქვეყნების თავდაცვის სექტორებთან არიან დაკავშირებული, რის გამოც ამერიკის მხრიდან დაწესებული შეზღუდვები შეეხებათ.

დასავლური მედიის ცნობით, სულ „შავ სიაში“ 58 ჩინური და 45 რუსული კომპანია შეიყვანეს, მათ შორის კორპორაცია „როსტეხ“, მასში შემავალი გაერთიანებული ავიასამშენებლო კორპორაცია, კომპანიები „მიგ“ და „ტუპოლევ“, „ობორონპრომ“, ასევე რუსეთის თავდაცვის სამინისტრო და საგარეო დაზვერვის სამსახური. შეზღუდვები გავრცელდება, ასევე, კომპანიაზე „რუსეთის ვერტმფრენები“, ყაზანის ვერტმფრენების ქარხანაზე, სპეციალურ მფრინავ რაზმზე „როსია“, კომპანიაზე „სუხოი“ და სხვ.

„შავ სიაში“ შეყვანილი კომპანიები აშშ–ში ვეღარ შეიძენენ გარკვეულ პროდუქციას და ტექნოლოგიებს. შედეგად, ვაშინგტონის მიერ მიღებული ზომების მიზანია, ორი ქვეყნის „მადესტაბილიზირებელ სამხედრო პროგრამებში“ ვეღარ გამოიყენონ ამერიკული ტექნოლოგიები.