თბილისი (GBC) - პირველმა კრიპტოვალუტამ ისტორიული მაქსიმუმი განაახლა. მის ასეთ ზრდას ილონ მასკის განცხადებამ შეუწყო ხელი: „ბიტკოინი ისეთივე კარგია, როგორც ფიატური ფული“.

კვირა–ორშაბათის ღამეს 1 ბიტკოინის ფასი კრიპტობირჟაზე Binance ყველა დროის მაქსიმუმზე ავიდა – $24 300. ამის შემდეგ მისი ფასი $23 000–მდე დაეშვა, თუმცა, დღეს დილით, თბილისის დროით 11:30 საათისთვის ბიტკოინი $23 919 ღირს.

გასული დღე–ღამის განმავლობაში ბიტკოინი 1,3%–ით გაიზარდა.

SpaceX–ისა და Tesla–ს გენერალურმა დირექტორმა ილონ მასკმა ტვიტერზე გუშინ რამდენიმე პოსტი მიუძღნა ბიტკოინს. კერძოდ, ის წერდა, რომ „ბიტკოინი თითქმის ისეთივე კარგია, როგორც ფიატური ფული“ (ფიატური ფული - ფული რომლის ნომინალური ღირებულება გარანტირებულია სახელმწიფოს მიერ, მიუხედავად მასალის ღირებულებისა, რომლითაც ეს ფული არის დამზადებული).

ბიტკოინის კურსის აღმავლობის ბოლო ტალღა 11 დეკემბერს დაიწყო, როდესაც მისი კურსი $17 500–მდე იყო ჩამოსული. სულ რაღაც 5 დღეში აქტივმა ისტორიული ზღვარი გადალახა და $20 000–ს ასცდა. ბოლო 10 დღეში ბიტკოინის კურსი 36%–ით გაიზარდა.