თბილისი (GBC) - ევროკავშირის უმსხვილესი ავტომწარმოებლები შეთანხმდნენ, რომ ბენზინისა და დიზელის ძრავებზე მომუშავე სატვირთო მანქანებს 2040 წლიდან აღარ გაყიდიან. ამის შესახებ Financial Times წერს.

შეთანხმებას კომპანიების Daimler, Scania, Man, Volvo, Daf, Iveco და Ford წარმომადგენლებმა ევროპელი ავტომწარმოებლების ასოციაციის ეგიდით მოაწერეს ხელი. ალიანი აკუმულატორულ ლტექნოლოგიებზე, წყალბადზე და ეკოლოგიურად სუფთა საწვავზე გადაერთვება.

მწარმოებლების გაერთიანება ახალ ტექნოლოგიებში 50–100 მლრდ ევროს დააბანდებს. ავტომწარმოებლები მთელი ევროპის ტერიტორიაზე მავნე გამონაბოლქვზე გადასახადის გაზრდის ინიციატივითაც გამოდიან.

მანამდე ვრცელდებოდა ინფორმაცია, რომ საფრანგეთის ხელისუფლებამ ელექტრომობილების შეძენის სუბსიდირება გადაწყვიტა. მეორადი ელექტრომობილის შეძენის მსურველები მთავრობისგან 1000 ევროს მიიღებენ, ხოლო ახალი ელექტრომობილის შეძენისას სახელმწიფოსგან 7 000 ევროს სუბსიდირებას მიიღებენ.