თბილისი (GBC) – TBC კაპიტალის ინფორმაციით, საცხოვრებელი უძრავი ქონების მიმართულებით, დეკემბრის პირველ კვირაში ბინების გაყიდვის ტრანზაქციები კვლავ ზრდის დადებით ნიშნულზეა.

6 ივლისიდან გაცემულ იპოთეკურ სესხებში სუბსიდირების პროგრამის ბენეფიციართა წილი 35.1%-ია.

5 დეკემბრის მდგომარეობით თბილისში ბინების გაყიდვების რეგისტრაციის 7-დღიანი საშუალოს წლიური ცვლილება კვლავ დადებით ნიშნულზეა და 18% შეადგინა.

„იპოთეკური კრედიტების მხარდაჭერის მექანიზმის" სახელმწიფო პროგრამა 2020 წლის 1 ივლისიდან ამოქმედდა. პროგრამის ფარგლებში, 5 წლის განმავლობაში შესაძლებელია იპოთეკური სესხის წლიური საპროცენტო განაკვეთის 4%-იანი სუბსიდირებით სარგებლობა.

იპოთეკური სესხის სუბსიდირება მხოლოდ დეველოპერულ კომპანიებში შეძენილ ბინებზე ვრცელდება.

სესხის მაქსიმალური მოცულობა 200 000 ლარია, სესხის დაფარვის მაქსიმალური ვადა კი - 240 თვე.

სუბსიდიის მისაღებად, განაცხადის ბოლო დღე 2020 წლის 31 დეკემბერია.