თბილისი (GBC) - მიკროჩიპების შემქმნელებმა გერმანული მომავლის პრემია მიიღეს. გერმანიის ერთ–ერთი მთავარი სამეცნიერო პრემია – გერმანული მომავლის პრემია – მკვლევარების ჯგუფმა მიიღო, რომელმაც მიკროჩიპების შექმნის ინოვაციური ტექნოლოგია შეიმუშავეს.

აღნიშნული პრემია, 25 ნოემბრის საღამოს, გერმანიის პრეზიდენტმა ფრანკ–ვალტერ შტაინმაიერმა პირადად გადასცა პიტერ კიურცს, მიხაელ კიოსტერსს და სერგეი იულინს, რომლებიც სხვადასხვა ტექნოლოგიურ კომპანიებს წარმოადგენენ.

გერმანიის ეკონომიკის მინისტრმა პეტერ ალტმაიერმა მკვლევართა ჯგუფის მუშაობის კომენტირებისას აღნიშნა, რომ მათ მიკროჩიპების წარმოება მაქსიმალურ ზღვრამდე გაზარდეს, „რომლებიც აუცილებელია ისეთი მიმართულებებისთვის, როგორიცაა ავტომობილების ავტონომიური მართვა და ხელოვნური ინტელექტის განვითარება“.

მკვლევარებმა ამ მიღწევისთვის ღრმა ულტრაიისფერში ფოტოლიტოგრაფიის მეთოდს მიმართეს, რაც ერთ–ერთი პერსპექტიული მიმართულებაა ნანოელექტრონიკაში.

პრემიის ნაწილს, რომლის მოცულობაც 250 000 ევროს შეადგენს, მეცნიერები საქველმოქმედო ფონდში გადარიცხავენ. გერმანიის მომავლის პრემია პრეზიდენტის პატრონაჟით 1997 წლიდან გაიცემა.