თბილისი (GBC) - კომპანიების SpaceX და Tesla დამფუძნებელი ილონ მასკი პლანეტის უმდიდრეს ადამიანებს შორის მეორე პოზიციას იკავებს, რათქვამია სააგენტო Bloomberg-ის კვლევაში.

მასკის ქონებამ, რომელმაც  Microsoft–ის დამფუძნებელს ბილ გეითსს გაუსწრო, $127,9 მლრდ შეადგინა. აქედან $100,3 მლრდ ილონ მასკმა ბოლო ერთი წლის განმავლობაში გამოიმუშავა, რაც წლიური ზრდის რეკორდული მაჩვენებელია. ბილ გეითსის კაპიტალის მოცულობა $127,7 მლრდ–ს შეადგენს.

უმდიდრესთა რეიტინგში ლიდერობას Amazon-ის დამფუძნებელი ჯეფ ბეზოსი მყარად ინარჩურებს, თავისი $182 მლრდ–ით. პლანეტის ყველაზე მდიდარი ადამიანების ხუთეულში არიან Facebook-ის დამფუძნებელი მარკ ცუკერბერგი და  Louis Vuitton Moët Hennessy–ს პრეზიდენტი ბერნარ არნო.

ელექტრომობილების მწარმოებელი Tesla–ს აქციების ფასი გუშინდელ ვაჭრობაზე მკვეთრად – 7%–ით გაძვირდა და ერთი აქციის ფასმა $524,96–ს მიაღწია. კომპანიის აქციების ზრდას ხელს უწყობს ინფორმაცია, რომ Tesla 2020 წლის 21 დეკემბრიდან საბირჟო ინდექსში S&P 500 შევა. გასული გვირის განმავლობაში კომპანიის აქციების ფასი 16%–ით გაიზარდა.